ESKLUSSIVA !

Il-memorji li nġeddu permezz tal-programm REFLEX fuq Capital Radio 88.7 qegħdin dejjem jiġġeddu aktar permezz ta’ www.reflexmalta.com. Esklussivament, minn din il-ġimgħa qed inwasslu intervista u ritratti dwar ir-RAFFLES. Mhemm’x dubju li r-Raffles Discoteque ta’ St Andrews kien wieħed mill-aqwa postijiet ta’ divertiment matul is-snin tmenin,  post ta’ nostalġija u memorji sbieħ.

REFLEXMALTA intervistat lil Mark Grima, proprjetarju tar-Raffles fis-snin tmenin.

L-ISTORJA TAR-RAFFLES (L-Ewwel Parti)

Meta kien infetaħ ir-Raffles?
Ir-Raffles Club ta’ St Andrews kien infetaħ f’Marzu tal-1982. Qabel kien proprjeta tas-servizzi ingliżi. Kien il-post fejn kienu jieklu l-uffiċjali tas-servizz (officer’s mess) u kellhom dance hall isfel.

Min kien imexxi r-Raffles?
Meta hadnieħ aħna, jien kelli 20 sena u kont immexxih flimkien ma ħuti Pierre u Simon. Imbagħad Pierre kien ħa l-Alley u Simon kien manager tal-Victoria Pub. Kienet era vera tajba għax-xena tal-clubs f’Malta. Ir-Raffles kien sab ruħu fil-boom tal-aqwa mużika tas-snin tmenin, speċjalment dik New Romantic. Kif kienu jinfetħu l-bibien il-club kien jimtela mill-ewwel speċjalment fejn kien hemm id-dancefloor. Kellna wkoll kompetizzjoni tajba minn Styx u Stownes.

X’ħin kien jiftaħ ir-Raffles?
Konna ħloqna dak is-suq ta divertiment li kien jibda kmieni. Infatti l-bibien tar-Raffles kienu jiftħu fis-sitta u nofs ta’ fil-għaxija u kienu jiġu żgħażagħ minn kull post ta’ Malta, bil-vannijiet jew b’tal-linja. Il-maġġoranza ma kienx ikollhom trasport tagħhom. Min kien responsabbli tat-trasport pubbliku kien għamel shuttle service dirett mill-belt għar-Raffles u lura. Kulħadd jiftakar il-kjus enormi taz-żgħażagħ jistennew fit-terminus tal-belt.  Immaġina tal-anqas elf ruħ juzaw tal-linja fl-istess ħin għall-istess post. Imbagħad fid-disa’ u nofs konna ngħalqu għal xi nofs siegħa biex innaddfu u wara nerġgħu niftħu. Fis-sajf konna niftħu kuljum waqt li fix-xitwa niftħu fil-weekend biss. Ir-Raffles kien jesa madwar tlett elef ruħ f’lejla waħda.

Għala taħseb li r-Raffles kien daqshekk popolari u x’kellu tant speċjali ?
Ir-Raffles kellu kunċett u disinn oriġinali ta’ dik l-era. Il-proprja disinjatur tal-club kien Frank Portelli li miet riċentament. Huwa kien pittur u addatta l-idejat tagħna b’mod artistiku. Id-dancefloor tar-Raffles kienet saret mill-kumpanija Lightlab u kienet identika tad-dancefloor li tidher f’Saturday Night Fever, il-film tal-1978. Kif kont tidħol ir-Raffles mill-ewwel kont tiftakar f’dal-film. Kien hemm ukoll il-wall modules pariġġ. Żidna wkoll il-video screen u aktar tard id-DJ beda jdoqq mill-gallarija. Id-dancefloor  baqghet dejjem l-istess.

L-isbaħ mument  tar-Raffles?
L-isbaħ mument għalija kienu meta ġibt lill-grupp Osibisa ġewwa r-Raffles darbtejn.

Kantanti u artisti oħra li ġew ir-Raffles?
Kienet ġiet Samantha Fox meta kienet fl-aqwa tagħha bħala kantanta fl-Ingilterra u fl-Ewropa. Kellna wkoll kantanti oħra bħal Riccardo Fogli, Den Harrow, Amanda Lear u gruppi bħal The Real Thing u Modern Romance.  Artisti oħra mistiedna kienu Stevie Starr (li kien jibla l-affarijiet u jerġa joħroġhom tale quale), Janet Charles (timita lir-reġina ingliża) u Suzanne Mizzi, Page 3 Girl.

Ir-Raffles kien jorganiżża wkoll kunċerti minn gruppi Maltin. Kunċert kbir kien dak tar-Riffs. Wara konna erġajna ġibna lil Ray l-Ingliż meta kien qiegħed barra minn Malta flimkien mal-Characters. Kunċerti oħra tajbin kienu dawk ta’ Brainstorm,  B3, X-Tend, Mirage u Winter Moods (dak iz-zmien bil-kantant Mark Doneo). Clyde Puli għamel żmien promoter ta’ dawn il-kunċerti fir-Raffles.

L-istorja tar-Raffles tkompli  ....

>> L-ISTORJA TAR-RAFFLES (It-Tieni Parti)

Int tiftakru r-Raffles? Tinsiex li tista tikteb fil-guestbook u tgħidlina dwar l-esperjenzi tiegħek.

 

Raffles Pyjama Party 1984	Champagne Party with Riccardo Fogli - April 1985
Winter Moods live at Raffles - May 1988	B3 live at Raffles
Characters live at Raffles - July 1984	Riffs live at Raffles
Osibisa at Raffles	Osibisa Concert
	The Victoria Pub
Raffles Champagne Party Invitation	Den Harrow @ Raffles